Got gebe ir iemer guoten tag [German translation]

1.

Got gebe ir iemer guoten tag

unde lâze mich noch gesehen,

die ich minne und niht erwerben mag.

mich müet daz ich si hœre jehen,

wie holt si mir entriuwen wære.

und sagt mir ein ander mære,

des mîn herze inneclîchen kumber

lîdet iemer sît. owê, wie süeze ein arebeit!

ich hân ein senfte unsenftekeit.

2.

"Ich wære dicke gerne frô,

wan daz ich niht gesellen hân.

nû si alle trûren sô,

wie möhte ich eine denne lân,

ich enmüeze ir vinger zeigen lîden,

ich enwolte fröide durch si niht mîden.

sus behabe ich wol ir hulde, daz siz lâzen

âne nît. wand ich gelache niemer niht,

dâ ez ir dekeiner siht."

3.

"Got hât vil wol ze mir getân,

sît ich mit sorgen minnen sol,

daz ich mich underwunden hân

dem alle liute sprechent wol.

im wart von mir in allen gâhen

ein küssen und ein umbevâhen.

dô schôz mir in mîn herze, daz mir iemer

nâhe lît, unz ich getuon, des er mich bat.

ich tætez wurde mirs diu stat."

4.

Ez tuot mir inneclîchen wê,

als ich gedenke wes man pflag

in der werlte wîlent ê.

owê, daz ich niht vergezzen mag, wie

rehte frô die liute wâren.

dô kunde ein sælig man gebâren unde

spilte im sîn herze gegen der

wunneclîchen zît.

sol daz iemer mêr geschehen,

sô müet mich, daz ichz hân gesehen.

• Artist:Walther von der Vogelweide