Ballade des menus propos [Portuguese translation]

Je congnois bien mouches en laict ;

Je congnois à la robe l’homme ;

Je congnois le beau temps du laid ;

Je congnois au pommier la pomme ;

Je congnois l’arbre à veoir la gomme ;

Je congnois quand tout est de mesme ;

Je congnois qui besongne ou chomme ; (1)

Je congnois tout, fors que moy-mesme.

Je congnois pourpoinct au collet ;

Je congnois le moyne à la gonne ; (2)

Je congnois le maistre au valet ;

Je congnois au voyle la nonne ;

Je congnois quand piqueur jargonne ;

Je congnois folz nourriz de cresme ;

Je congnois le vin à la tonne ;

Je congnois tout, fors que moy-mesme.

Je congnois cheval du mulet ;

Je congnois leur charge et leur somme ;

Je congnois Bietrix et Bellet ; (3)

Je congnois gect (4) qui nombre et somme ;

Je congnois vision en somme ;

Je congnois la faulte des Boesmes ; (5)

Je congnois le povoir de Romme ; (6)

Je congnois tout, fors que moy-mesme.

Prince, je congnois tout en somme ;

Je congnois coulorez et blesmes ;

Je congnois mort qui nout consomme ;

Je congnois tout, fors que moy-mesme.

• Artist:François Villon
• Album:Poésies diverses (1458) - 03 - III