Pinturas lyrics

Narami ite ses tue e narami ite so deo

in custa vida chi si che fuit chena frimare mai, chena pasare.

Narami, cando, inue e narami, dae te lu creo,

si sa vida si podet frimare che in d'una pintura pro l'ammirare:

dio imprentare custu mamentu de miradas, carignos ebbìa

chin sos coros, de amore aposentu, chi sun tzochende in cumpagnia;

dio imprentare s'amore sagradu chi nos unit in cust'armonia,

dae sa musica inghiriadu, durches suspiros e poesia.

‘Ida l'as cussa pintura? Magica in d'una tela

chi at frimadu su tempus cun sa manu de Raffaello, Leonardo o Giotto.

‘Ida l'as? Canta durcura in sos trattos de una anghela:

si paret isvelare misterios a chie la mirat narrer non potho.

Friman su tempus chi est passadu friman buttios de carchi vida

dendeli a chie l'at pintadu fama de manu dae Deus beneìda.

E deo cherzo frimare s'ispantu cando dorminde a curtz’a mie

a sos ojos li mustras s'incantu de cussas carres nidas che nie.

Narami tue, pintura, e narami, no b'at chesura,

si sa tela est fatta de musica e su pinzellu de poesia.

Chelu, chen’e una nue, frores, colores tue

ses s'aera, s'istella chi lughet, sa luna, su sole, sa pintura mia.

Imprentamus s'amore sagradu chi nos unit in cust'armonia

dae sa musica inghiriadu, durches suspiros e poesia.

Custu cantu imprentat s'amore che una tela rara e nodida:

deo e tue semus su pintore chi a manos unidas imprentat sa vida.

• Artist:Maria Luisa Congiu