زیندانی ئەژدەھاک [Zindani Ajdahak] lyrics

ئەژدەھاک! زیندانت قەڵاقەڵایە؛

دیواری کۆنکرێت، دەرگای پۆڵایە

ئەژدەھاک! کون بڕە، سەختە زیندانت،

ناڕووشێ بە بڕبەن بەندی گرانت!

ھێزی لەش مرێنە کۆت و زنجیرت؛

کارییە لە دەمار ناپاکیی بیرت

دڵ ڕەقیت ھەر تاوە چەشنە سزایە

بۆ بەندیی خاوەن ھۆش ئەخاتە کایە

ھێند چەشن سەربڕ و زیندانەوانت،

سەرخۆشن بە خوێنی گشت بەندییەکانت!

ئەژدەھاک! ئەی دێوی لە «بیر» زراوچوو،

ئەی ناشتای مارانت بە مێشک کردوو!

ئەو مێشک تازانەی زنجیرت کردوون،

لە لێوی پێچاڵی مەرگا ڕاتگرتوون،

چاوەڕیێ فەرمانن بە ڕێی نەھاتا

ببرێنە بەر تەناف لە نۆرە و کاتا،

مێشکیان، ئامانجیان، ھیوا و تاسەیان

لە پەتا بتاسێ وەک ھەناسەیان!

ئەمانە گشت ئەڕۆن، ئەیانڕەوێنی،

ھیچ نەبێ لە بەندا ئەیانڕزێنی...

بەڵام تۆ، ئەژدەھاک! لە ھەڵپەی خۆراک

ناتوانی بکەوی بۆ ماری ناپاک؛

ھەر ئەگری، ئەکوژی، ئەدەی لە گەردن،

مێشک دەرخوارد ئەدەی بە ماری نەوسن

تا ڕۆژێک ئەو خوێنەی بە ناحەق ڕشتت،

ئەو بیرەی وات زانی ئێجگاری کوشتت،

تاو ئەدەن تەنووری دەماری کاوە،

ئەو چەکوش وەشێنەی ڕۆڵە کوژراوە

ئەخرۆشێ و ئەجۆشێ و کۆمەڵ یەک ئەخا،

ھەر ھەڵسا و ئەبینی زیندانت ڕووخا!

ئەو حەلە ھەر لاوێ لە زیندانتا مرد

ئەبێتە مایەی بەخ بۆ نەتەوەی کورد؛

لە بنکەی پەیکاریا ئەنووسرێ ناوی

لەگەڵ گشت کردەوەی پەسەندکراوی!

• Artist:Abdulla Goran