Maniger frâget, waz ich klage lyrics

1.

Maniger frâget, waz ich klage

unde giht des einen, daz ez iht von herzen gê.

der verliuset sîne tage,

wand im wart von rehter liebe nie weder wol

noch wê. des ist sîn gelücke kranc.

swer gedæte,

waz diu minne bræte,

der vertrüege mînen sanc.

2.

Minne ist ein gemeinez wort und doch

ungemeine mit den werken, dêst alsô.

minne ist aller tugende ein hort,

âne minne wirdet niemer herze rehte frô.

sît ich den gelouben hân,

frouwe Minne,

fröit ouch mir die sinne!

mich müet, sol mîn trôst zergân.

3.

Mîn gedinge ist, der ich bin

holt mit rehten triuwen, daz si ouch mir daz

selbe sî. triuget dar an mich mîn sin,

sô ist mînem wâne leider lützel fröiden bî.

neinâ hêrre! si ist sô guot,

swenne ir güete

erkennet mîn gemüete,

daz si mir daz beste tuot.

4.

Wiste si den willen mîn,

liebes unde guotes, des wurde ich von ir

gewert. wie möhte aber daz nû sîn, sît man

falscher minne mit sô süezen worten gert?

daz ein wîb niht wizzen mac,

wer si meine,

disiu nôt aleine

tuot mir manigen swæren tac.

5.

Der diu wîp alrêrst betrouc, der hât beide an

mannen und an wîben missevarn. ichn weiz

waz diu liebe touc, sît sich friunt gegen friunde

niht vor falsche kann bewarn.

frouwe, daz ir sælic sît!

lânt mit hulden

mich den gruoz verschulden,

der an friundes herzen lît.

• Artist:Walther von der Vogelweide