Dû maget vil unbewollen [Leich C] lyrics

1.

Dû maget vil unbewollen,

der Gedêônes wollen

gelîchest dû bevollen,

die got selbe begôz mit sîme touwe.

Ein wort ob allen worten

entslôz dîner ôren porten:

des süeze ob allen orten

dich hât gesüezet, süeze himelfrouwe.

2.

Daz ûz dem worte erwahsen sî,

daz ist von kindes sinnen frî:

ez wuohs ze worte und wart ein man.

dâ merket alle ein wunder an:

ein got, der ie gewesende, wart

ein man nâch menschlîcher art.

Swaz er noch wunders ie begie,

daz hât er überwundert hie.

des selben wunderæres hûs

was einer reinen megde klûs

wol vierzig wochen und niht mê,

âne alle sünde und âne wê.

3.

Nû bitten wir die muoter

und ouch der muoter barn,

si reine und er vil guoter,

daz si uns tuon bewarn,

Wan ân si kann nieman

hie noch dort genesen.

widerred daz ieman,

der muoz ein tôre wesen.

• Artist:Walther von der Vogelweide