Penckackus cáusaj ckarani lyrics

I

Nocka cani cantorcito,

cantorcito sachamanta.

Yachanaaptiyquish maymanta

na huillasoj niyquish ‘rini:

suj quichuista huaanmi cani,

Villa Salavinamanta.

Liberalta leeptincuna,

mosítojt uyarerani,

allit atendeporani,

suj ckarita nombrarancu,

quichuamantapas nerancu

¡ancha achcat cusicorani!

Don Domingo A. Bravota

Liberalpi nombrarancu.

Quichuap cursonta nerancu

pay yachachícoj casckanta.

Escuelata formasckanta

ñauckeypi conversarancu.

Chayrajmi chay ckari llojsin

idiomaishta defendespa

quichuayshta favorecespa

na ckonckascka tíaj cara.

Ni pipas mana yuyara

causarancu despreciaspa.

II

Penckacus cáusaj carani

quichuista niaptincuna.

Castillap ‘rimaptincuna

huasapi sáyaj carani.

Upallas ánchoj carani

túcuy despreciaptincuna.

Cháyraj mana unitaymanta

cantajta lugart ckoancu

paycunalla na mañaancu

“quichuayquipi cántay”, nispa.

Cháyraj si gustapucuscka;

sapa ckaahuaspa munancu.

Chá ladinuspa mediunpi

mayllapipas na yaycuni.

Na mana recelacuni,

nockata conversapucus.

Guitarrias y cantapucus

quichuitayta lucichini.

Chay ckari Don Dominguta

nocka ‘rejsiyta deciani.

Caymanta felicitani

mana atis ‘ris saludayta

quichuallapi coplasniyta

paypajmi dedicapuni.

• Artist:Sixto Palavecino