Owê daz wîsheit unde jugent lyrics

Owê daz wîsheit unde jugent

des mannes schoene noch sîn tugent

niht erben sol sô ie der lîp erstirbet

daz mac wol clagen ein wîser man

der sich des schaden versinnen kan

reimâr waz guoter kunst an dir verdirbet

dû solt von schulden iemer des geniezen

daz dich des tages nie wolte verdriezen

dun spræches ie den vrouwen wol ...

des sün si iemer danken dîner zungen

und hetest anders niht wan eine rede gesungen

sô wol dir wîb wie reine dîn nam dû hetest alse gestriten

an ir lob daz elliu wîb dir iemer genâden solten biten.

Dêst wâr reinmâr dû riuwest mich

michels harter danne ich dich

ob dû lebtest und ich wær erstorben

ich wil ez bî mînen triuwen sagen

dich selben wolt ich lützel klagen

ich klage dîn edelen kunst daz si ist verdorben

dû kundest al der werlte fröide mêren

sô du ez ze guoten dingen woltes kêren

mich riuwet dîn wol redender munt und dîn vil süezer sanc

daz die verdorben sint bî mînen zîten

daz dû niht eine wîle mohtest bîten

sô leist ich dir gesellschaft mîn singen ist niht lanc

dîn sêle müuze wol gevarn und habe dîn zunge danc.

• Artist:Walther von der Vogelweide