'O pezzènte. [Italian translation]

Tu, pezzénte, staie buóno ‘e salute,

nun tiéne cchiù scuórno:

te ‘mpuóste, apre ‘a mano,

e si’ cèrto c’a ffuria ‘e smestute,

c’a ffuria ‘e i’ attuórno,

te faie chiano chiano

chillo pìzzeco ‘e lire, ca ògne anno

assómma a migliare:

senz’arte e né parte.

E durmènno, vestènno, magnanno,

t’abbusche ‘e denare

p’e méttere ‘a parte.

Ogne tanto ce scappa ‘o cazóne,

‘a scarpa, ‘o cappiéllo,

‘a giacca, ‘a cammisa.

Niénte tasse, nun pave pesòne:

tu si’ puveriéllo,

t’hê fatta ‘a divisa.

Magne e vive da vèro milòrdo,

nisciuno te véde,

nisciuno te cura;

si’ pezzènte: te’ cca n’atu sòrdo

e ognuno te créde

na trista criatura.

E tu, invece, staie buóno ‘e salute,

nun tiéne cchìù scuórno:

te ‘mpuóste, apre ‘a mano;

e si’ cèrto c’a ffuria ‘e smestute,

c’a ffuria ‘e i’ attuórno

tu si’ crestiano

d’abbuscarte, sènz’arte e né parte

e sènza vriògna

(pecché nun ne tiéne),

assaie cchiù ‘e chi campa cu ll’arte,

chi stènta cu ll’ógne

sta vita de péne.

‘O pezzènte si’ tu? no, sóngh’i’!

Ca si sòffro, aggio vòglia ‘e muri’!

• Artist:Raffaele Viviani
• Album:Le videopoesie di Gianni Caputo