‘E ccòse ‘mpruvvisate

Tutte ‘e ccòse ‘mpruvvisate

sóngo sèmpe sapurite:

‘e cchiù mèglie ‘nnammurate,

l’aggio avute, me credite?,

sènza quase sapé cómme,

scasualmènte, faccia a faccia.

Sèmpe primma ‘e sapé ‘o nòmme

m’e truvavo dint’e braccia.

«Còre mio, te vòglio bbène! »

«E pur’io! » Ch’è sta currènte

ca ce métte dint’e vvéne

sta caurara ‘e fuóco ardènte?

Io mo t’aggio canusciuta,

tu m’hê visto sulo mo:

na guardata, e si’ caduta,

e pur’io cadènno sto.

‘E stu passo, n’atu ppòco

ca sti mmane ce strignimmo,

cómme a ll’acqua ‘ncòpp’ ‘o ffuóco

ce ‘nfucammo e po vullimmo.

E chi si’? Nun ne parlammo,

nun me prème d’o ssapé.

Io chi so’? Nun ce penzammo.

Ce sta sfizio? E viéne a mme!

Ce ‘o ddicimmo vócca e vócca,

musso e musso, còre e còre.

Che n’hê ‘a fà si chi te tòcca

è Viciénzo o Sarvatóre?

Che me prème e che me ‘mpòrta

si si’ Brìggeta o ‘Ngiulina,

si ‘a cammisa è lònga o córta,

vaie cu ‘a scarpa o cu ‘a scarpina!

Io te vòglio? E tu dimustre

ca sóngh’io chillo ca vuo’?

Véco dint’a st’uócchie lustre

ll’uócchie mieje ca lustre so’?

E dicìmmoce abbracciate

tutto chéllo ca sentimmo:

po cacciammo ‘e cunnutate:

ma pe mo, chi simmo simmo.

A nu surzo d’acqua frésca

cirche ‘a carta ‘identità?

Lèva ‘a séte? Te renfrésca?

Se capisce po’ addo’ va.

Dice ‘a ggènte ‘nfacci’ô sole:

Tu ce scarfe ma chi si’?

E nemméno cu ‘e ffiglióle

sti pparole s’ hann’a dì.

Tu me scarfe e daje calóre?

me cunzuóle ‘a giuventù?

e si ‘o sóle nasce e mòre,

nasce e muóre pure tu.

• Artist:Raffaele Viviani
• Album:Roberto Murolo più... , Vol. 11 (Compilation)