Campanilismo [Italian translation]

Nu Milanése fa na còsa? Embè,

tutta Milano: "Evviva 'o Milanèse!"

È rròbba llòro e l'hann'a sustené,

e 'o stésso 'o Turinése e 'o Genovése.

Róma? : "Chisto è Rumano e si è Rumano,

naturalmènte vène primma 'e té.

Róma è la Capitale!" E si è Tuscano,

Firènze ne fa sùbbeto nu rré.

Si fa na còsa bòna nu Pugliése?

Bari, cu tutte 'e pPuglie, 'o ffa sapé.

Si è d'a Basilicata o Calavrése,

na gara a chi cchiù mèglio 'o po' tené.

È nu Palermitano o Catanése?

tutt''a Sicilia: "Chisto è figlio a mmé!"

Si è n'Umbro, Sardo, Vèneto, Abruzzése,

'a tèrra sóia s'o vanta cómme a cché.

Le fanno 'e ffèste, aìzano 'o pavése:

sènza suttilizzà si è o nun è.

Nun c'è nu Parmigiano o Bolognése

ca 'e suóie nun s'e ddifende; e pecchè

si è nu Napulitano, 'a città sóia

'o ricunósce e nun ce 'o ddà a paré?

S'o vasa 'nzuónno e nun le dà sta giòia.

E 'e trómbe 'e ll'ate squillano: " Tetèee! "

Qualunque còsa fa, siénte: " E ched'è? "

" 'O ssaccio fà pur'io." "Sènza pretése. "

E chésto simme nuie. Dòpo di ché,

Nun se fa niénte 'e buóno a stu paése?

E tu, Nàpule mia, permiétte chésto?

Strìgnece 'mpiétto a tté, figlie e figliaste.

Arapencélle 'e bbraccia e fallo priésto:

avimm'a stà a " guaglióne " e simmo maste.

T'avante 'e vermiciélle, 'e ppummaròle:

mméscace pure a nuie si 'o mmeretammo.

Che vvuò, ca, cu stu ciélo e chistu sóle,

te dammo nu saluto e ce ne jammo?

Campanilismo bèllo, addò sì ghiuto?

Facìmmolo nuie pure cómme a ll'ate.

Si no p'a gènte 'e Napule è fernuto,

e nun sarrammo maie cunsiderate.

Talènto ne tenimmo, avimmo ingégno:

nu pòco sulo ca ce sustenimmo,

cunquistarrammo chillu pòsto dégno

ca, pè mullézza nòsta, nun tenimmo.

Quanno na còsa è bbòna e è nata ccà,

nu milióne 'e gènte l'ha da dì.

E vedarraie po' Nàpule addò va,

cu tutto ca è 'o paése d'o ddurmì.

• Artist:Raffaele Viviani
• Album:Raffaele Viviani