Nieman kan mit gerten [Palindromlied] [German translation]

Nieman kan mit gerten

kindes zuht beherten.

den man zêren bringen mac,

dem ist ein wort als ein slac.

Dem ist ein wort als ein slac,

den man zêren bringen mac.

kindes zuht beherten

nieman kan mit gerten.

Hüetent iuwer zungen,

daz zimt wol den jungen.

stôz den rigel für die tür,

lâ kein bœse wort dar für.

Lâ kein bœse wort dar für,

stôz den rigel für die tür,

daz zimt wol den jungen.

hüetet iuwer zungen!

Hüetent iuwer ougen

offenbâr und tougen.

lânt si guote site spehen

und die bœsen übersehen.

Und die bœsen übersehen!

lânt si guote site spehen

offenbâr und tougen

hüetent iuwer ougen!

Hüetent iuwer ôren,

oder ir sint tôren.

lânt ir bœsiu wort dar in,

daz gunêret iu den sin.

Daz gunêret iu den sin,

lânt ir bœsiu wort dar in,

oder ir sint tôren.

hüetent iuwer ôren!

Hüetent wol der drîer,

leider alze frîer.

zungen, ougen, ôren sint

dicke schalkhaft, zêren blint.

Dicke schalkhaft, zêren blint

zungen, ougen, ôren sint,

leider alze frîer.

hüetent wol der drîer!

Nieman ritter wesen mac

drîzec jâr und einen tac,

im gebreste muotes,

lîbes oder guotes.

Lîbes oder guotes,

im gebreste muotes,

drîzec jâr und einen tac,

nieman ritter wesen mac

• Artist:Walther von der Vogelweide