Воскресения день lyrics

Пѣснь а̃

Воскресе́нїѧ де́нь, просвѣти́мсѧ лю́дїе: Па́сха, Госпо́днѧ Па́сха! Ѿ сме́рти бо къ жи́зни, и ѿ землѝ къ Небесѝ, Хрїсто́съ Бо́гъ насъ преведѐ, побѣ́днꙋю пою́щїѧ.

Пѣснь г̃

Прїиди́те, пи́во пїе̑мъ но́вое, не ѿ ка́мене непло́дна чꙋдодѣ́емое, но нетлѣ́нїѧ исто́чникъ, изъ гро́ба ѡдожди́вша Хрїста̀, въ Не́мже оутвержда́емсѧ.

Пѣснь д̃

На боже́ственней стра́жи, богоглаго́ливый Аввакꙋ́мъ да ста́нетъ съ на́ми, и пока́жетъ свѣтоно́сна а́ггела, ꙗ́снѡ глаго́люща: дне́сь спасе́нїе мíрꙋ, ꙗ́кѡ воскре́се Хрїсто́съ, ꙗ́кѡ всеси́ленъ.

Пѣснь е̃

ОУ́тренюемъ оу́треннюю глꙋбокꙋ̀, и вмѣ́сто мѵ́ра пѣ́снь принесе̑мъ Влады́цѣ, и Хрїста̀ оу́зримъ, Пра́вды Со́лнце, всѣ̑мъ жи́знь возсїѧ́юща.

Пѣснь ѕ̃

Снизше́лъ єсѝ въ преиспо̑днѧѧ землѝ и сокрꙋши́лъ єсѝ вереѝ вѣ́чныѧ, содержа́щїѧ свѧ́занныѧ, Хрїстѐ, и тридне́венъ, ꙗ́кѡ ѿ ки́та Іѡ́на, воскре́слъ єсѝ ѿ гро́ба.

Пѣснь з̃

О́троки ѿ пе́щи изба́вивый, бы́въ человѣ́къ, стра́ждетъ ꙗ́кѡ сме́ртенъ, и стра́стїю сме́ртное въ нетлѣ́нїѧ ѡблачи́тъ благолѣ́пїе, Єди́нъ благослове́нъ отце̑въ Бо́гъ, и препросла́вленъ.

Пѣснь и̃

Се́й нарече́нный и свѧты́й де́нь, єди́нъ сꙋббо́тъ ца́рь и госпо́дь, пра́здниковъ пра́здникъ, и торжество̀ є́сть торже́ствъ: въ о́ньже благослови́мъ Хрїста̀ во вѣ́ки.

Пѣснь ѳ̃

А́ггелъ вопїѧ́ше Благода́тнѣй: чи́стаѧ Дѣ́во, ра́дꙋйсѧ, и па́ки рекꙋ̀, ра́дꙋйсѧ: Тво́й Сы́нъ воскре́се тридне́венъ ѿ гро́ба, и ме́ртвыѧ воздви́гнꙋвый, лю́дїе, весели́тесѧ.

Свѣти́сѧ, свѣти́сѧ, но́вый Іерꙋсали́ме: сла́ва бо Госпо́днѧ на тебѣ̀ возсїѧ̀, ликꙋ́й ны́нѣ, и весели́сѧ, Сїо́не! Ты же, Чи́стаѧ, красꙋ́йсѧ, Богоро́дице, ѡ воста́нїи Рождества̀ Твоего̀.

• Artist:Christian Hymns & Songs