Lo guarracino lyrics

Lu Guarracino ca jeva p’o mmare

Lle viene voglia ‘e se ‘nsurare

Se facette nu bello vestito

De spine e de scarde, pulito pulito

Cu ‘na parrucca tutta ncrifata

De ziarelle mbrasciulate

Cu lu sciabò, scuollo e purzine

De ponta angrese fine fine

‘Ddoie belle cateniglie

De premmone de cunchiglie

‘nu cappiello aggallunato

De codarini d’aluzze salate

Tutto pòsema e steratiello

Jeva facenno lu sbafantiello

Gerava da ‘cca e da là

La ‘nnammurata pe se truvà

La Sardella a lu barcone

Steve sunanno lu calascione

E a sono de trumbetta

Ghieve cantanno ‘sta arietta:

“O larello o marellena

E la figlia da zì Lena

Ha lassato lo ‘nnammurato

Pecché niente l’ha rialato!”

Lu guarracino che la guardaje

De la sardella se ‘nnammuraje

Se ne jette da la Vavosa

La ‘cchiu ‘bbecchia maleziosa

L’ebbe ‘bbona rialata

Pé mannarle ‘na mbasciata

La vavosa pisse pisse

Chiatto e tunno ‘nce lo disse

La sardella che la sentette

Rossa rossa se facette

Pè lu scuorno che se pigliaje

Sotto a ‘nu scuoglio se ‘npezzaje

Ma la vecchia de la vavosa

Subbeto disse: “Ah schefenzosa

De sta manera non truove partito

‘ncanne te resta lu marito!

Si aie voglia de te allucà

Tante smorfie nun aje da fa:

Fora le zeze e fora lu scuorno

Anema e core, faccia de cuorno!

Ciò sentenno la zì Sardella

S’affacciaje a la fenestella

Facette l’uocchie azzennarielle

A lu speruto ‘nnammuratiello

Ma la patella che steva de posta

La chiammaje “Faccia tosta

Tradetora, sbregognata

Senza parola e malenata

Ch’avea ‘nchiantato l’Allitterato

Primmo e antico ‘nnammurato

De carrera da chisto jette

E ogni ccosa le ricette

Quanno la ‘ntise lo puveriello

Se lo pigliaje Farfariello

Jette a la casa, se armaje a rasùlo

Se ncarricaje comme a nu mulo

De scuppette, de spingarde

Povere, palle, stoppa e scarde

Quatte pistole e tre bbajonette

Dinto a la sacca se mettette

Ncoppa a li spalle settanta pistune

Ottanta bombe e cento cannune

E comme a Guappo Uallarino

Ghieva truvanno lo Guarracino

La desgrazia de chisto purtaje

Che mmiezo a la piazza se lo ncuntraje!

Se l’afferra po’ cruattino

E ppò le dice: “Ah malandrino

Tu me lieve la nnammurata

E pigliatella sta mazziata!”

Tuffete taffete a meliune

Le deva paccare e secuzzune

Schiaffe ponie e perepesse

Scuppulune fecozze e cunnesse

Scerevecchiune e sicutenosse

E l’ammacca uosse e pilosse!

Venimmancenne che a lu rummore

Pariente e amice ascettero fore

Chi cu mazze, curtielle e curtelle

Chi cu spate, spatune e spadelle

Chillo cu varre chisto cu spito

Chi cu ammennole e chi cu antrito

Chi cu tenaglie, chi cu martielle

Chi cu turrune e susamielle!

Pate, figlie, marite e mmugliere

S’azzuffajeno comm a ffere

A meliune correvano a strisce

De chisto partito e de chille li pisce!

Che bediste de sarde e d’alose

De palamete e raje petrose

Sarache dientece e achiate

Scureme tunne e allitterate

Treglie, tremmole, trotte e tunne

Feche cepolle laùne e rutunne

Purpe secce e calamare

Pisce spata e stelle de mare

Pisce palumme e pisce rnartielle

Pisce palummo e piscatrice

Voccadoro e cecenielle

Capechiuovo e guarracine

Cannulicchie, ostreche e angine

Vongole, cocciole e patelle

Piscecane e grancetielle

Marvizze, marmure e vavose

Vope prene, vedove e spose

Spìnole, spuònole, sierpe e sarpe

Scàuze nzuòccole o cu lli scarpe

Scunciglie gammere e raoste

Vennero ‘nfino cu lli poste!

Capitune saure e anguille

Pisce gruosse e piccerille

D’ogni ceto e nazione

Tantille, tante, cchiù tante e tantone!

Quanti botte mammamia

Che se deveno arrassosia!

A centenaro le varrate

A meliune le pretate

Muorze e pizzeche a bbeliune

A deluvio le secuzzune

Nun ve dico che bivo fuoco

Se faceva per ogni luoco!

Tettettè ccà pistulate

Tattattà là scoppettate

Tuttuttù ccà li pistune

Bubbubbù là li cannune

Ma de cantà so ggià stracquato

E me manca mò lu sciato

Sicché dateme licenzia

Graziosa e bella audienzia

Nfi che sorchio “na meza de seje”

Co salute de luje e de leje

Cà se secca lu cannarone

Sbacantannose lu premmone!

• Artist:Nuova Compagnia di Canto Popolare
• Album:Lo guarracino (1972), Li sarracini adorano lu sole (1974)