'A mamma. lyrics

Vuje c'ancòra tenite

'a mamma vòsta, si nun 'a stimate,

pe vulè bène a n'ata

ca cchiù bène ve vo' vuje ve credite,

gènte, o 'nfama o 'ngannata,

nun 'e mmettite a paragóne maje,

ca l'ammóre d'a mamma è gruósso assaje!

Na vòta ce stéva uno

ca pe la nnammurata

tutta 'a furtuna sója dòpp'asseccata,

pròpeto nun sapéva cchiù che fà

p'a puté cuntentà.

-Damme -éssa lle dicéva-

òro, aniélle, brillante!

òro, aniélle, brillante isso lle déva...

-Pòrta! -e chillo purtava,

E si dicéva: arruóbbe -isso arrubbava,

E si dicéva: accide! -isso accedéva!

-Che buó cchiù? Si' cuntènta?

C'ato t'aggio da dà?

-No, cuntènta nun sóngo,

nun m'avasta -E tu parla,

dimme, c'ato aggi'a fà?-

-Ma 'o ffaie? Giura! -T'o giuro!-

-E si no st'uócchie miéie,

tu cchiù nun vedarraje,

si chéllo ca vòglio io nun me darraje!

Tè! Chist'è nu curtiéllo,

addu màmmeta va,

scìppale 'o còre e portammillo ccà!

E chillo nfamo jètte,

e stu curaggio avètte!...

Ma c'o stésso curtiéllo,

(c'a mano scellarata le tremmaje)

sceppanno 'o còre â mamma,

nu dito se tagliaje......

E sapite sta mamma,

gènte, che lle dicètte?

Dicètte:-Figlio, te si' fatto male?-

E, guardànnole 'o dito,

suspiranno, murètte.....

• Artist:Salvatore Di Giacomo
• Album:Le videopoesie di Gianni Caputo