Si stu miérolo me sésca... lyrics

Si stu miérolo me sésca

quann’ i’ traso int’o purtóne,

che vulite, ave raggióne,

nun me pòzzo ribbellà.

Córe a ccóre isso m’ha visto

ciénto vòte cu Nannina,

córe a ccóre — ògne matina

e ògne séra — raggiunà...

Mo véde a me sultanto. E fa stu sisco

cómme vulesse dicere: «Ch’è stato?»

Comme vulésse dìcere: «’O ccapisco:

Nannina t’ha lassato...»

M’ha lassato. E sì, va bène...

Me disprèzza — sta cu n’ato —

m’ha traduto — m’ha cuffiato —

c’aggi’a fà? M’aggi’a sparà?

Si me sparo e po che dice

sta simpàtica vicina

ca è antipàtica a Nannina,

e già sta’ pe s’abbuccà?...

Miérolo, ca mo tuórne a fà stu sisco,

si’ fino! Me vuo’ dì’: «Mo ll’ ’he’ ncarrata!

Nannina è nfama? E tu miettela ’o ffrisco.

Chesta è mmeglia ’e chell’ata!..».

• Artist:Salvatore Di Giacomo
• Album:Le videopoesie di Gianni Caputo