Psalm 65 lyrics

‏1 למנצח מזמור לדוד שיר

‏2 לך דמיה תהלה אלהים בציון ולך ישלם נדר

‏3 שמע תפלה עדיך כל בשר יבאו

‏4 דברי עונת גברו מני פשעינו אתה תכפרם

‏5 אשרי תבחר ותקרב ישכן חצריך נשבעה בטוב ביתך קדש היכלך

‏6 נוראות בצדק תעננו אלהי ישענו מבטח כל קצוי ארץ וים רחקים

‏7 מכין הרים בכחו נאזר בגבורה

‏8 משביח שאון ימים שאון גליהם והמון לאמים

‏9 וייראו ישבי קצות מאותתיך מוצאי בקר וערב תרנין

‏10 פקדת הארץ ותשקקה רבת תעשרנה פלג אלהים מלא מים תכין דגנם כי כן תכינה

‏11 תלמיה רוה נחת גדודיה ברביבים תמגגנה צמחה תברך

‏12 עטרת שנת טובתך ומעגליך ירעפון דשן

‏13 ירעפו נאות מדבר וגיל גבעות תחגרנה

‏14 לבשו כרים הצאן ועמקים יעטפו בר יתרועעו אף ישירו

• Artist:King David