מינוטן פֿון יאוש [Minutn fun ye'ush] lyrics

אַ יאָר שױן מלחמה

װי שרעקלעך װי גרױס

װי לעבט מען דאָס איבער

װי האַלט מען דאָס אױס.

אַ יאָר פֿון רדיפֿות

פֿון צרות פֿון פּײַן

װאָס װעט פֿון אונדז װערן

װאָס װעט פֿון אונדז זײַן.

אומזיסט אונדזער בעטן

ס׳דערגרײַכט נישט גאָטס צעלט

דער הימל פֿאַרשלאָסן

װי דאָס האַרץ פֿון דער װעלט.

דער הימל פֿאַרשלאָסן

און מרהדיק שװאַרץ

עס הײבן אָן ספֿקות

צו נאָגן מײַן האַרץ.

עס הײבן אָן ספֿקות

אַנטפּלעקן דעם סוד

נישטאָ מער קײן יושר

נישטאָ מער קײן גאָט.

קײן שטיקל נחמה

נאָר צרות און פּײַן

װאָס װעט פֿון אונדז װערן

װאָס װעט פֿון זײַן.

• Artist:Mordechai Gebirtig