Istrales lyrics

Un’istrale a sos cumpanzos

chi cumpanzos non sun prusu,

como attenden sos istranzos

cara a terra e fundu a susu.

Un’istrale a sos cumpanzos

chi non lassen su masone

e una bella surra ‘e punzos

gai torramus a cumone.

Un’istrale a sos cantores

de su binchidore nou,

ratza mala ‘e brincadores

chi in totube fachen s’ou.

A sos battor moriteddos

chi los truvet s’istoria

che puntorzu a sos poleddos

gai lis torrat sa memoria.

A sa corte printzipale

chi a sos sardos cheret mudos,

chene limba naturale

gai no semus limbudos.

A sos homines de nudda,

sos chi furan a sa zente,

chene coro e chene tudda,

furan puru s’innotzente.

Un’istrale a tie cumpare

disizosu et abramidu

chi pro fachere dinare

fintzas s’anima as futidu.

Un’istrale a tie cumpare

e unu raju mannu mannu,

cun s’inferru a murr’a pare

chi t’acaten intro s’annu.

Ammentaebos cuss’istrada,

cuss’istrada ‘e mala sorte:

chi Felice est numenada

s'inde riet puru sa morte.

Ammentaebos cuss’istrada,

ammentaebos sas rughes,

bos amparet sa torrada

Deus in nottes chene luches.

B’inde cheren de cosinzos

a la currere sa vida

tra suore e pistichinzos

isetende sa bessida.

B’inde cheren de cosinzos

ma b’at chie, sende sintzeru

custa vida de mischinzos

l’est currende iscurtzu a beru.

• Artist:Piero Marras