Io cchiù non vedo. [Italian translation]

Io cchiù nun véco dint'a ll'uócchie tuóje

chélla luce d'ammóre appassiunata

e ll'atu juórno, quanno m’e gguardaje,

st'ànema mia nun è vulata a tte.

Tutta 'a jurnata nc’aggio reflettuto

cercanno a cchistu còre lu pecchè!

E stu còre m'ha ditto “Overamènte,

si te vulésse dì c’aggio penato,

quanto te stimo, faciarria peccato

pecchè nun saccio io stésso che vo' dì.

Ll'aggio vuluto nu zeffunno 'e bbène

ma quanto e quanto m'ha fatto suffrì”.

Aggio cercato ‘nciélo tutt'e stélle

che dint'a li nuttate ‘e primmavèra

t’hanno ‘ndurato sta faccélla 'e céra,

quann’io dicévo: “’A stélla mia si’ tu!...”.

Nun m'hanno ditto manco na paròla

Nisciuna ‘e llòro s'allicòrda cchiù!

Aggio sfugliato ‘e lléttere d'ammóre

ca me scrivive quanno ero luntano.

Ricordo: tanno me tremmava 'a mano,

nu fuóco 'mpiétto sentévo saglì!

Embe', stavòta, niénte nce ha pututo!

Me so stancato d'e lèggere, accussì.

Tutto mòre a stu munno! E chistu còre

pure è muórto pe tte, scujèta mia!

Mo s'è scurdato tutt'a frennesia,

mo vo' stà sulo e cchiù nun vo' paté!

‘O ssaccio cèrto ca nce chiagnarraje,

ma chést'è ‘a vita, scurdaténne ‘e me!

Tu nun m'aje fatto niénte, tu si’ stata

bèlla e fedéle, appassiunata e cara,

m'hê sullevata chésta vita amara,

ànema e cuórpo te si’ data a mme!

Si me passave ‘e mmane ‘int'e capille

io me sentévo ‘e sperdere pe tte!

Si me guardave cu chill'uocchie belle

che so state pe me na calamita

Io, t'allicuorde? Nce perdevo'a vita!

Nun cumbinavo manco a raggiuna'!

Cómme â funtana ‘e ll'acqua avvelanata

bevévo e me sentévo affattura'!

Mo, niente nce po' cchiu'! Mo chistu còre

è muórto pure pe stu piétto mio.

Nun saccio si sóngh'io o nun sóngh'io

ca parlanno cu tte parlo accussi'

Saccio sultanto che 'ncòppa a sta terra

tutto chéllo ca nasce ha da muri'!

• Artist:Ferdinando Russo
• Album:Le videopoesie di Gianni Caputo