E cecate 'e Caravaggio [Italian translation]

-"Dimme na còsa. T’ allicuórde tu

e quacche faccia ca p'o munno ê vista,

mo ca pe sèmpe nun ce vide cchiù?"

- "Sì, m’ allicòrdo; e tu?" - "No, frato mio

io so’ nato cecato. Accussì nciélo,

pe mme murtificà, vulètte Dio…

- "Lassa sta’ Dio!…Quant’ io ll’ aggio priato,

frato, nun t'ô puo’ manco mmaggenà,

e Dio m’ ha fatto addeventà cecato".

- "E’ ovèro ca fa luce pe la via

‘o sóle?…E cómm’ è ‘o sóle?" - "‘O sóle è d’ òro,

cómme ‘e capille ‘e Serrafina mia…"

- "Serrafina?…E chi è? Nun vène maie?

Nun te vène a truvà?" - "Sì…quacche vòta…"

- "E cómm’ è? Bèlla assaie?" - "Sì…bèlla assaie…"

Chillo ch’ era cecato ‘a che nascètte

Suspiraie. Suspiraie pure chill’ ato,

e ‘a faccia mmiéz‘e mmane annascunnètte.

Dicètte ‘o primmo, dòppo a nu mumènte:

–Nun te lagnà, ca ‘e màmmema carnale

io saccio ‘a vóce…’a vóce sulamènte…

E se stéttero zitte. E attuórno a llòro

addurava ‘o ciardino, e nciélo ‘o sóle

luéeva, ‘o sóle bello, ‘o sóle d’ òro…

• Artist:Salvatore Di Giacomo
• Album:Zì munacella (1888)