Desiderio lyrics

Chisti capille tuóje d’ òro filato

sóngo 'ntessute cu nu raggio ‘e sóle!

Chist’ uócchie bèlle ca m’ hanno 'ncantato

sóngo d’ acquamarina e de vïòle.

E chésta vócca de curallo ròsa,

ca sulo ‘nciélo 'n’ ata ‘a può vedè,

chiù de tutt ’e tesòre è prizïósa

quanno me parla e quanno ride a mme.

E chésta vóce è mùsica gentile

ca pare asciuta da n’òrgano d’ òro !

Santa Cecilia, 'int’a 'na séra ‘abbrile

‘o facètte éssa stu capolavóro !

Chisti sciure ‘e paròle armunióse

nisciuna vócca ‘e ppo’ ffà spuntà cchiù,

‘mmiscate cu ll’addóre ‘e ciénto ròse

e cuncertate cómm ’e ddice tu !

Chésti mmanélle so’ d’avòlio fino

e lisce, sfusatèlle e trasparènte.

Pàreno giglie ‘e dint’ a 'nu ciardino

addò rignasse 'na Fata lucènte !

Bellézza ‘e suónno, sentimènto ‘e còre,

perfezzióne ‘e Ddio, suspiro ‘e Rre,

tòrname 'nzuónno pe' parlà d’ammóre

ca nisciuno te sònna cómm’ a mme !!

• Artist:Ferdinando Russo
• Album:Poesie napoletane (1910)