Ar vamm lazherez [French translation]

1

Trizek bugel am eus ganet

En desped din nemet merc'hed

Daouzek anezho 'm eus lazhet

N'on ket deu't 'benn an drizekvet

N'on ket deu't 'benn an drizekvet

Ha n'eo ket hep bezañ klasket.

2

An noz all pa oan kousket krenn

Gant un drouz skrijus 'tihunen

Ur marvran ruz-tan ha diskarn

'Sanke e veg don em skouarn

Hag unan all gwenn-kann-eon

'Skilfe ha 'gigne ma divronn

Hag antronoz d'ar gouloù de'z

En em gavet 'oan dougerez

En em gavet 'oan dougerez

Genel 'raen en abardaez

Ur verc'h vihan an drizekvet

Pa m'oa ken c'hoant paotrig kaouet

Ur verc'h vihan he blev rouz-flamm

Heñvel buhez ouzh re he mamm

Ur verc'h du-glaou he daoulagad

Diouzh re he mamm disheñvel mat

Ne ouzen dare piv an tad :

« Hunit, hunit 'ta ma merc'hig

Hag ober 'rin deoc'h allazig

Hag ober 'rin deoc'h un toullig

Dindan ar sapin el liorzhig

Ha kanañ 'rin deoc'h ur chañson

Gwerz ar marv, kan an anaon ! »

'Boa ket gant ma ger echuet

Ma roen dezhi laezh kontammet

Ma roen dezhi laezh kontammet

Goulenn 'rae en-dro p'oa denet

Kemer 'raen neuze ur blueg-treid

Hag he mougen hep keuz ebet

A-benn ur pennad goude-se

Balbouzat a rae adarre

Balbouzat a rae 'n he c'havell

Kemer 'raen neuze ur gontell

Ha da skeiñ fulor ennon

Ha da skeiñ 'barzh he c'halon

Ha da skeiñ 'barzh he bruched

En aner, ne ziwade ket

Ha da skeiñ a-daol-da-daol

Ha da skeiñ 'vel unan foll

Ha da skeiñ, skeiñ kemen'

Ma erruen skuizh ha 'semplen

Ma erruen skuizh ha 'semplen

Antronoz vintin 'tihunen

Gant c'hoarzhoù ma merc'h milliget

A seblante din o lâret :

« Na pegen mat 'm eus-me kousket ! ».

3

Ha setu hi deuet d'he oad

Evit ma brasañ kalonad

Abred ha diwe't, noz-ha-de'z

Ne ra din nemet gwall-vuhez

Ne ra din nemet gwalldroio'

Un deiz a vo ma distrujo :

« Me ho ped ma mamm, ma mammig

Daoust hag eñ rofec'h din ho pig ?

Ma kleuzfen un toull er jardrin

Da blantañ eno ur sapin

Da blantañ ur sapin eno

E lec'h 'n hini kozh 'zo marv

E lec'h 'n hini kozh 'zo gweñvet

Ma mamm, ma mammig, me ho ped ! »

Ha me paourkaezh sod da blegañ

Ha da reiñ dezhi peadra

Ha da reiñ dezhi peadra

Nebeud goude 'lâre din c'hoa' :

« Echu ma zoullig ma mammig

Deu't 'ta da welet un tammig ! »

Ha me ken kredig da vonet

Ha brusk en toull ganti bountet

Ganti bountet hag interet !

4

Ha setu me en douar don

Seziset on gant ar spouron

Ha da gleuziañ, da ziskrapat

Allas, allas din, hep tro vat

Allas, allas din, 'ra netra

‘Met kouezhañ 'm eus aon donoc'h-c'hoa'

Ha da grial ha da hopal

Met den d'am c'hlevet em noz teñval

Ha da c'hervel a-bouez ma fenn

Met den d'am respont em bez yen

'Met trouz gludennek ar preñved

O rampañ etre ma bizied !

5

Met petra 'n dodi-se 'n un taol

Ha donet 'ran da vezañ foll ?

Met petra 'n un taol 'n dodi-se ?

Lârit din 'ta, e anv Doue !

'Welan a-bell ur stroll o tont

En e benn an Ankoù, ur spont !

Hag eñ pignet war ur marc'h dall

En daou du tanfoeltr o strakal !

En daou du tanfoeltr ha moged

D'e heul bugale o vonet

D'e heul o vonet krouadurien

Digiget o c'horf hag o fenn

D'e heul o vonet merc'higoù

O ma ene, ma re eo !

Ha 'tonet o-holl war ma zro

Ha 'koroll, 'kanañ war un dro

Ha war un dro 'koroll, 'kanañ

A-dro-da-dro tisoc'h-tishañ :

« Hunit mammig, hunit bravig

Ha kanañ 'raimp deoc'h ur sonig

Ha kanañ 'raimp deoc'h ur sonenn

Gwerz ar soufrañs, kan an ifern ! »

• Artist:Denez Prigent