Nanneddu meu [German translation]

[Torrada]

Nanneddu meu, Nanneddu meu,

Nanneddu meu, su mundu est gai,

a sicut erat, a sicut erat

a sicut erat non torrat mai.

Semus in tempos de tirannias,

infamidades e carestias;

como sos populos cascant che canes

gridende forte "cherimus pane".

Famidos, nois semus papande

pane e castanza, terra cun lande;

terra ch'a fangu, torrat su poveru

chentz'alimentu, chentza ricoveru.

Semus sididos, in sa funtana

pretende s'abba parimus ranas.

Pejus su famene chi forte sonat

Sa janna a totus e no perdonat.

Cussas banderas, numeru trinta,

de binu ‘onu mudad’ant tinta;

apenas mortas cussas banderas

non pius s'osservant imbriacheras.

Abbocaeddos, laureados,

butzacas boidas e ispiantados,

in sas campagnas papant mura

che crabas lanzas in sa cresura.

Sos tristos corvos a chie los lassas?

pienos de tìrrias e malas trassas.

E gai chin totus fachimus gherra

pro pagas dies de vida in terra

Adiosu Nanni, tenet'a contu,

fache su surdu, betat'a tontu;

a tantu l'ides: su mundu est gai,

a sicut erat non torrat mai.

• Artist:Peppinu Mereu