Tu duórme lyrics

Tu duórme, io véglio! E quanno sto' scetato,

pecché 'a nòtte nun pòzzo arrepusà,

te sònno, e cu chist’uócchio affaticato

te véco dint’o suónno smanià!

Che stai sunnanno, Scióre ’e passióna?

Pòzzo sperà? Pòzzo sapè ched’è?

No! So’ pazzo! Perdònarne! Perdòna!

Io nun me crédo ca te suónne a mme!

Io nun me crédo ca tu me vuo' bène,

e, ’a verità, nun ce aggio mai creduto!

Ma pènzo a stu Destino, e a chésti ppéne,

e a chisto còre, appriésso a te perduto!

Duórme cuntènta, Scióre mio d’ammóre!

E, quanno ’o sóle all’arba arriva a tte,

te pòrta tutt’o ffuóco ’e chistu còre,

ma nun fa niénte, si nun piénze a mme!

Quanta vòte, tremmanno ’e sta pazzia,

aggio tanto penzato ’e te scurdà!

E quanta vòte chest’ànema mia

ha ditto all’uócchie miei: Nun 'a guardà!

Ma pe fà chésto, Còre mio d’ammóre,

pe nun te suspirà, pe nun patì,

n’ òmmo, che t’ha fissato a tutte ll’ óre

nun ha da fà niént’ato: ha da' muri!

Duórme! Io te métto na curóna ’e ròsa

ncòpp’a sta frónte e a sti capille nire!

Duórme, nun penzà a me! Duorme, arreposa!

Tutt”e spine ’e ttengh’io! Tutt”e suspire!

Vòglio sunnà cu l’uócchie apiérte ancòra

e albanno juórno te vòglio vedé

schiùdere chélla vòcca arrobbacòra

cómm’a nu scióre ncòpp’a nu buchè!

E vòglio cadè. stanco e affaticato

nun saccio addò, pe te putè sunnà,

cchiù bèlla de nu scióre ch'è sguigliato,

ma cchiù crudéle ’e tutt”e nfamità!

• Artist:Ferdinando Russo
• Album:Le videopoesie di Gianni Caputo