The Markirya Poem [English translation]

Men cenuva fánë cirya

métima hrestallo círa,

i fairi nécë

ringa súmaryassë

ve maiwi yaimië?

Man tiruva fána cirya,

wilwarin wilwa,

ëar-celumessen

rámainen elvië

ëar falastala,

winga hlápula

rámar sisílala,

cálë fifírula?

Man hlaruva rávëa súrë

ve tauri lillassië,

ninqui carcar yarra

isilmë ilcalassë,

isilmë pícalassë,

isilmë lantalassë

ve loicolícuma;

raumo nurrua,

undumë rúma?

Man cenuva lumbor ahosta

Menel acúna

ruxal’ ambonnar,

ëar amortala,

undumë hácala,

enwina lúmë

elenillor pella

talta-taltala

atalantië mindonnar?

Man tiruva rácina cirya

ondolissë mornë

nu fanyarë rúcina,

anar púrëa tihta

axor ilcalannar

métim’ auressë?

Man cenuva métim’ andúnë?

• Artist:J. R. R. Tolkien
• Album:The Monsters and the Critics and Other Essays