Su ballitu cadenzadu lyrics

[Torrada:]

Su ballitu cadenzadu

ballade, comare mia:

milli gràssias dare dia

a chie l’at inventadu.

Ischirighia, comare!

no 'nde tenzades birgonza:

ca preíderu cun monza

custu lu poden ballare:

no est ballu 'e mat'a pare,

est ballu chena pecadu.

Santos l’an aer balladu

cando fin in custu mundu.

Millu mi' su ballu tundu,

su ballitu cadenzadu.

[Torrada]

Tundu su ballu, perdeu!

che i's'arzola 'e su tricu:

millu mi' su ballu anticu

chi balleit jaju meu

pro render gràssias a Deus

e cun jaja in cumpannia!

Custa sí ch'est poesia

de s'antica zente onesta!

Custa sí ch’est sarda festa,

ballade comare mia!

[Torrada]

Sentza birgonza peruna

ballade giòvanas bellas!

Goi ballan sas istellas

supra s'arzola 'e sa luna,

goi ballat sa fortuna

cun coas de fantasia!

Ajò bella, ischirighia!

Che cando fimis minores

ballemus. A sos mazores

milli gràssias dare dia.

[Torrada]

Custu motu, risu e pache

de s'onestade est baldoria:

goi sa zente antigória

balleit in su nuraghe.

Custu santu fache-fache

pro sos frutos de s'aradu,

pro tusorju e porchinadu,

beniat postu in parusu.

Dae su ballu 'e su fusu

lu den aer inventadu.

• Artist:Sardinian & Corsican Folk