Salvatore Di Giacomo - Na tavernèlla.

Maggio. Na tavernèlla

'ncòpp'Antignano: ‘addóre

d'anèpeta nuvèlla:

‘o cane d'o trattóre

c’abbaia: ‘o fusto ‘e vino

'nnanz'a pòrta: ‘a gallina

ca strilla ‘o pulicino:

e n’aria frésca e ffina

ca vène ‘a còpp'e mónte,

ca se 'mmésca c'o viénto,

e a sti capille 'nfrónte

nun fa truvà cchiù abbiénto …

Stammo a na tavulélla

tutte e dduje. Chiano chiano

s’allònga sta manella

e m’accarézza ‘a mano …

Ma ‘o bbì ca dint'o piatto

se fa frédda ‘a frettata? …

Cómme me so’ distratto!

Cómme te si’ ncantata! …

• Artist:Salvatore Di Giacomo