Salvatore Di Giacomo - Lariulà

(Duetto)

Lui: – Frutto ‘e granato mio, frutto ‘e granato,

quanto t’aggio stimato a tiémpo antico!

Tiénete ‘o muccaturo arricamato,

tutta ‘sta rrobba mia t'a benedico…

Lei: – Quanto si’ bèllo e quanto si’ curtèse!

io t’èro indifferènte e mo se véde;

tècchete ‘o muccaturo ‘e séta ingrése…

fóssero accise ll’uómmene e chi ‘e ccréde!

Insieme: – Fóssero accise ll’uómmene (‘e ffémmene)

e chi ‘e ccréde!…

Ah, lariulì

lariulì lariulá…

Ll’ammóre s’è addurmuto

nun ‘o pòzzo cchiù scetá…

Ah, lariulì,

lariulì lariulá…

Ll’ammóre s’è addurmuto

nun ‘o pòzzo cchiù scetá…

Lui: – E quanno è chésto, siénte che te dico:

Io faccio ‘ammóre cu na farenara;

tène nu magazzino ‘int’a stu vico,

ll’uócchie ca tène só’ na còsa rara…

Lei: – E quanno è chésto: Io pure faccio ‘ammóre

e a n’atu ninno mo tèngo ‘o penziéro…

s’èrano date a fuóco ánema e còre:

mme só’ raccummannata a nu pumpiére…

Insieme: – (Lui) Io faccio ‘ammóre cu na farenara...

(Lei) Mme só’ raccumannata/o a nu pumpiére…

Ah, lariulì

lariulì lariulá…

Ll’ammóre s’è addurmuto

nun ‘o pòzzo cchiù scetá…

Ah, lariulì,

lariulì lariulá…

Ll’ammóre s’è addurmuto

nun ‘o pòzzo cchiù scetá…

Lui: – Ah, vòcca rossa cómm’a nu granato!

Chi ‘o ssape ‘o tiémpo antico si è fernuto?…

Chéllo ch’è cèrto è ch’io stó’ 'ntussecato,

e ‘o sapóre d'o ppane aggio perduto!

Lei: – Si’ stato sèmpe bèllo e ‘ntussecuso,

e pure, siénte, vide che te dico,

nun mme ne ‘mpòrta ca si’ furiuso:

vòglio campá cu te, murí cu tico!…

Insieme: – Vòglio campá cu te murí cu tico!…

Ah, lariulì,

lariurì e lariulá…

L'ammóre s'è scetato

s'è scetato e lariulà!

Ah, lariulì,

lariurì e lariulá…

L'ammóre s'è scetato

s'è scetato e lariulà!

• Artist:Salvatore Di Giacomo
• Album:canzone napoletana