Le pornographe [Breton translation]

Gwechall, pa vezen ur ribitailh,

doñjer am boa eus ar gerioù lous,

ha pa veze "kaoc'h" war ma spered

n'el lavaren ket.

Met

hiziv an deiz, pa vez ma micher

komz evel ur furlukin,

ne chom ket "kaoc'h" war ma spered, feiz!

El lârout a ran.

Me 'zo ar Pornograf

eus ar fonograf,

al lavagnon

eus ar c'hanaouennoù.

Evit diduellañ an arvesterien

e tufan bouc'haj,

komzoù diwisk a-c'henaouadoù,

dizere-kenañ anezho.

Met

pa zegouezh din bezañ ma-unan-penn dindan ma zoenn,

en em ziskouezan gant ar biz em melezour bras,

hag e youc'han ouzhin "Paotr diseven,

kae gant ar seizh mil diaoul kornek!" 1

Me 'zo...

Bep Sadorn ez an da gofes

evit anzav bezañ komzet eus feskennoù,

hag e prometan d'ar marabout

e lakain berz warno.

Met

gant aon, ma ne gomzan ket outo ken,

na finisin ma buhez e-barzh Arme ar Silvidigezh,

e tegasan e-barzh dizale

ar feskennoù difeiz.

Me 'zo...

A-hend-all, ma gwreg

he deus un temz-spered c'hoantaus

a boulz anezhi da c'hourvez en noazh

dindan den-pe-zen.

Met

daoust hag e vo aotreet din, evit bezañ didro,

komz eus se war leurenn an davarn

hep lârout he deus d'ar muiañ

an tan ouzh he revr.

Me 'zo...

Bez' am bo eürusted, moarvat,

hag emichañs ar Groaz a Enor,

evit kanañ war an ton bras

ar garantez a gas da Rom 2

Met

"Turlututu" a lâras ma ael-mat,

arabat eo dit kanañ ar garantez

anez dezhi diglorin war blanedenn

ur c'hast.

Me 'zo...

Ha pa grogan da ganañ, laouen tout,

evit un tavarnour,

ur sonenn dudius diwar ar maez,

melkoniek e teu-eñ da vezañ

Ha

lârout a ra din, beuzet e vouezh e(barzh daeroù,

"Mar plij deoc'h kanañ ar bleuñv,

kreskent-i d'an nebeutañ e straed Blondel 3

'barzh ur vordel."

Me 'zo...

Da bep pardaez, kent koan,

e pourmenan ma fri war ar pondalez,

oc'h arvestiñ ouzh tud ar bobl

en kuzh-heol.

Met

na c'houlennit diganin kanañ diwar-benn se,

mard hoc'h eus aon na glevfec'h amañ

e plij din gwelout, diwar ma fondalez,

pennoù-klouk o tremen.

Me 'zo...

An eneoù mat war ar bed-mañ

'zo en-gortoz e teuy, d'am zremenvan,

Satan da doullgofañ

ar paotr marv-se lous e c'henoù.

Met

ra blijo d'ar Manitou bras,

pa ne ra forzh ebet eus ar gerioù,

degemer en e Jeruzalem,

d'ar c'houlz disliv...

ar Pornograf

eus ar fonograf,

al lavagnon

eus ar c'hanaouennoù.

1. E galleg: "Va te faire voir par les Grecs". 2. Da lârout eo ar garantez gristen. Damgomz 'zo amañ eus kanaouennoù Tad Duval.3. Ur straed Pariz brudet evit he bordili.

• Artist:Georges Brassens