Josefinayta [Portuguese translation]

Na huainitu cásckay pacha,

ñujñanaas ckallarerani

y mana animacorani

huarmi munasckayt huillayta,

imainachus causasckayta

cá payta nockápaj munas

cháyraj pockoshcara tunas

sumitajta yúyaj cani,

apasckayqui huillarani

paypas niara, ancha súmaj.

Chaina ‘rimanacuptiycu,

paypas nera munaasckanta

y mana sackeananta

atera suj llojsipuyta

mana munasckant nipuyta

y nockapajlla cananta;

niara huillacunanta

tatasninta y turasninta,

chaymantacka tiasninta

y tuquítuy yachanaajta.

Ckaanquishman cara ckarita

imainachus cusicora;

túcuy lauman huillacora:

na huarmíoj caj ‘risckanta;

ancha sumitaj casckanta,

chaallata micunap ina

y casckanta Josefina,

sutin ima quiquin paylla

y na chusasckanta ckailla

sujlláyaj ‘risckancunata.

Nami caj ‘rin nis puríptiy,

súpay chaupiman yaycora:

Tátay ancha piñacora,

mamaypas chayllaman cara.

“¡Sáckey, muchachu!” niara

“anchami utulalla canqui

casarácoj ‘risa canqui

imayquipi atenicuspa

ckayallam huarmiyqui ususpa

sujan ima ‘ripusoncka.”

Chayhuan llojsiaptincuna,

huáckay huáckaymi atiara,

sonckoypi laziacuara,

Josefinayt yuyarani,

tatayta ‘ris niporani

noviat mañacupanánpaj.

Niara: “Munanqui ckámpaj,

imayquipi atenicus;

huarmiyqui causancka micus

y ckamcka mana imayojpas”.

Chaina nias puchucaspa,

mamayta huajyas nipora;

ckaarani, ancha piñacora

mana yacharani imajchus;

tapusa cara yachajchus

tiasckanta ckonckachícoj

y casckanta Doña Amichu

salamanquera chaymanta,

y huayshta ckonckachinánpaj

mana casaracunánpaj.

Suj tuta puñusckallapi,

ckonckayllapi mosckorani;

huarmi yanata ckaarani

imatash mishpuchiara.

Diuscha yáchaj ímash cara

pero onckos llijcharani,

Josefinat ckonckarani,

umucha umuasa cara.

Amorniyta ckonckachiara.

Mana casaracorani.

• Artist:Sixto Palavecino