'A cusciénza lyrics

Vurria sapé’ ched’è chésta cusciénza

ca spisso aggio sentuto ’e nnummenà’;

stóngo speruto ‘e fa’ la conoscenza.

Spiecàteme che vvo' significà’.

Aggio spiato a nu maésto 'e scòla

ca tène scòla all'università.

M'ha ditto: “Figlio mio, questa parola

si usava si, ma tantu tiémpo fa.

Ora la coscienza si è disintegrata

pochi sóngo rimasti ‘e chilli llà

ca a ‘sta paròla réstano attaccate

campanno con onóre e dignità.

Mo c'è l'assegno a vuoto, il peculato,

‘a cambialètta e chésti ccòse ccà;

mariuóle ce ne stanno a tunnellate

'e tutt’e spècie, ‘e tutt‘e qqualità.

'O piccirillo, 'o gruósso, 'o gigantésco,

chille ca sanno cómm'hann'a arrubbà;

e chi 'i denunzia a chiste, chi s’ammésca,

so piézze gruósse, nè chi t'ô ffa fà'.

Mo ll'uóglio ô ffanno c’ô ssapone 'e piazza

‘o burro ‘mmócca te fa’ vummecà’

‘a pasta, ‘o ppane, ‘a carne, cos'e pazze:

si è aumentata la mortalità.

‘E mmedicine po che t’hanno fatto

t’hanno ‘mbriacato pure chélli là:

si sulo nu sciruppo mo t’accatte,

ringrazia a Ddio si siéguite a campà’.

E che vve pòzzo dì' 'e cèrti ffamiglie

ca a pèlle ‘ncuóllo fanno accapunà:

marito, móglie, mamma, sòra, figlie,

famme stà' zitto, nun me fa’ parlà’.

Perciò - m'ha ritto stu maésto 'e scòla -

sta conoscènza tu pecché ‘a vuo' fa’?

Nisciuno ‘a iusa chiù chésta paròla;

mò viéne tu e a’ vuo’ ripristinà’.

Insómma tu vuò i’ cóntro corrènte ,

ma 'sta penzata chi t'â fatta fà’:

‘a gènte 'e mo sulo accussi è cuntènta,

sènza cusciénza pò tirà’ a campà’.”.

• Artist:Totò