Xanê Xanan lyrics

Xanê xanan lami`ê necma te her pirnûr-i bî

Keştiya bextê te ez bayê muxalif dûr-i bî

Kewkeba se`da şeref tali` di nêv birca te bit

Da tinê j’ çerxê bela şubhê mehê menzûr-i bî

Encûmê çerxê muheddeb her ji zatê tey şerîf

Kesbê enwarê bikin hetta ko nefxa şûr-i bî

Lew ziyaret asitanî tête şemsa dewletê

Da sehergahan ji dîdarê şerîf pirnûr-i bî

Extera te j’ perdeya xeybê eger bêtin zuhûr

Dê bitin nişfi n-nehar e wer şebê deycor-i bî

»Ayetu l-kursî« û »En`am« heykela tûxê te bin

Bênihayet pir murad û bê`eded menşûr-i bî

Her kinarê wergerînî pê ve `ezm û himmetê

Rayeta fethê bi neşra »lem yezel« menşûr-i bî

Xeymeta nûrê `inayet zillê memdûdê te bit

Sûreyê »Ummu l-kitab« madarê hedret sûr-i bî

Paş-i Newşîrwan dibêm dê hakimê `adil tû yî

Mislê hatim dê bi danê der cihan meşhûr-i bî

Ma Cizîrê şubhê Darê textê heft iqlîm-i bit

Hem bi hukm û seltenet Eskender û Fexfûr-i bî

Mislê Cem cama zerîn xalî nebî te j` badeyê

Da ji xemra şadimanî da`imen mexmûr-i bî

Ma di baxê `êş û noşê her bi saz û erxewan

Kamiran û kamibexş û dilxweş û mesrûr-i bî

çendekê şîrînpuser derbendê dîwana te bin

Bendê şapûrê te bin ta Xusro û şapûr-i bî

Hindekê roj û şev in têk `îd û leyli l-qedr-i bin

Cam medam pir bade bit lê ne j` meya engûr-i bî

şubhetê Rûhi l-qudus `erdê tu pê lê daynî

Sebze û reyhan û nesrîn û gulê menqûr-i bî

Her derê ne`lê feres şubhet Buraqê vê kevit

çeşmeê heywan ji ew `erdê mubarek fûr-i bî

Ma te `umrê Xudr û Nûh û mulkê zu l-qerneyn bitin

Gunbeda çerxê mulemme` her bi te me`mûr-i bî

Xass-i teşrîfê te bin derya û derbendê `ecem

Da xelatên her seher sed zerkeş û mexmûr-i bî

Gerçi der dîwanê hedret pir heqîr în şubhê mûr

çeşmê te çeşmê Suleyman-i bi halê mûr-i bî

Ê ne wek goy bê ser û pa bêt di benda xidmetê

Ma di çewgana te her perkende û meqhûr-i bî

Ma lisanê min du`agoyê li der heq weşfê xan

Mezherê sirra kelamê wek di rexta tor-i bî

Her di medhê te û senayê sîne û qelbê Melê

Bê tefawut qulzema pir lû`lûwê mensûr-i bî

Ji asitanê dewletê xayib nebî carek Mela

Da ji fermanê mukerrem dem bi dem me`mûr-i bî

• Artist:Melayê Cizîrî