Swer mir schade an mîner frouwen [German translation]

1.

Swer mir schade an mîner frouwen,

deme wünsche ich des rîses,

dar an die diebe nement ir ende.

swer mîn dar an schône mit trouwen,

dem wünsche ich des paradyses

unde valde im mîne hende.

frâg ieman, wer si sî,

der bekenne si dâ bî:

ez ist diu wolgetâne.

genâde, frouwe mir,

der sunnen gan ich dir,

sô schîne mir der mâne.

2.

Swie mîn nôt geflüeger wære,

sô gewunne ich liep nâch leide

unde fröide manicvalde,

wan ich weiz vil liebiu mære:

die bluomen entspringent an der heide,

die vogel singent in dem walde.

dâ wîlent lag der snê,

dâ stât nû grüener klê,

er touwet an dem morgen.

swer nû welle, der fröuwe sich.

nieman nœt es mich;

ich bin unledic sorgen.

• Artist:Heinrich von Veldeke