'Nnanz'o canciéllo [Italian translation]

Nnanz’ô canciéllo d’o ciardino ‘nchiuso,

st’ànema mia, tremmanno, s’è fermata.

Facéva friddo. N’aucelluzzo ‘nfuso

zumpettiava ncòpp’â ferriata.

Luntano, ‘mmiézo all’èrba scarpesata,

aggio visto, cu l’uócchio pauruso,

’a casa cu ’a fenèsta ribazzata

e so’ rummaso tutt’appecundruso...

E m’è parza na casa abbandunata,

‘mmiez’ô ciardino, cu ’o canciéllo ‘nchiuso...

’O ciélo ’e viérno, tutto annuvulato,

chiuvéva ‘ntèrra làcreme ’e delóre.

Sótt’a stu chianto io me sóngo abbagnato,

e aggio ntiso d’e llàcreme ’o sapóre...

Nu juórno sano sano aggio passato

penzanno sèmpe e nun cuntanno ll’óre,

e 'o còre mio tremmanno t’ha chiammato

e ha cercato nu suónno ngannatóre.

E aggio aspettato... E quanto aggio aspettato!

E me scennéva ’a nòtte dint’o còre...

E so’ turnato ’a casa e t’aggio scritto,

e ’a carta ’e chianto amaro s’è ammacchiata!

E t’aggio apiérto ’o còre, e t’aggio ditto

quanto st’ànema mia t’ha suspirata!

Io stesso, tristo, appaurato e afflitto,

so’ ghiuto â posta e ’a carta aggio mpustata,

e ’o juórno appriésso, sulo e zitto zitto

me so’ fermato ‘nnanz’â cancellata...

Ma ‘ntèrra llà (chi me l’avésse ditto!)

aggio truvato ’a léttera... stracciata!

• Artist:Ferdinando Russo
• Album:Sinfonie d'amore (1905)