Malaurio [na bizzòca pazza]. [Italian translation]

— Trasitevénne dinto; sta chiuvènno!

Nzerrate 'a pòrta e jàteve a cuccà!

È da paricchio ca v'o sto’ dicènno,

ca chésta è n'óra brutta, chésta ccà!

È ll' óra c'o demmònio va trasènno

dint'e ccase d'a gènte pe tentà!

Trasitevénne, jàteme sentènno!

Cchiù fòra nun ve state a ntallià!

M'è cumparuto San Giuvanne a Mare!

M'ha cunfirate brutti ccunfirènze!

Pe nuie sarranno assai làcreme amare!

Pèsta, guèrra, culèra, carestìa,

cu 'o terramòto e tutt'e cunziquènze...

Trasitevénne rinto!... Avummaria!

• Artist:Ferdinando Russo
• Album:Sunettiata (1887)