Diu welt was gelf rôt unde blâ lyrics

Diu welt was gelf rôt unde blâ

grüen in dem walde und anderswâ

kleine vogele sungen dâ

nû schrîet aber diu nebelkrâ

pfligt si iht ander varwe jâ

sist worden bleich und übergrâ

des rimpfet sich vil manic brâ.

Ich saz ûf eime grüenen lê

da ensprungen bluomen unde klê

zwischen mir und eime sê

der ougenweide ist dâ niht mê

dâ wir schapel brâchen ê

dâ lît nû rîfe und ouch der snê

daz tuot den vogellînen wê.

Die tôren sprechent snîâ snî

die armen liute owê owî

des bin ich swære alsam ein blî

der wintersorge hân ich drî

swaz der unt der andern sî

der wurde ich alse schiere frî

wære uns der sumer nâhe bî.

Ê danne ich lange lebt alsô

den krebz wolt ich ê ezzen rô

sumer mache uns aber frô

dû zierest anger unde lô

mit den bluomen spilt ich dô

mîn herze swebt in sunnen hô

daz jaget der winter in ein strô.

Ich bin verlegen als êsâû

min sleht hâr ist mir worden rû

süezer sumer wâ bist dû

jâ sæhe ich gerner veltgebû

ê deich lange in selher drû

beklemmet wære als ich bin nû

ich wurde ê münch ze Toberlû.

• Artist:Walther von der Vogelweide