Bel m'es quan son li fruich madur lyrics

Bel m'es quan son li fruich madur

E reverdejon li gaim,

E l'auzeill, per lo temps escur,

Baisson de lor votz lo refrim,

Tant redopton la tenebror!

E mos coratges s'enansa,

Qu'ieu chant per joi de fin' Amor

E vei ma bon' esperansa.

Fals amic, amador tafur,

Baisson Amor e levo·l crim,

E no·us cuidetz c'Amors pejur,

C'atrestant val cum fetz al prim!

Totz temps fon de fina color,

Et ancse d'una semblansa!

Nuills hom non sap de sa valor

La fin ni la comensansa.

Qui·s vol si creza fol agur,

Sol Dieus mi gart de revolim

Qu'en aital Amor m'aventur

On non a engan ni refrim!

Qu'estiu et invern e pascor

Estau en grand alegransa,

Et estaria en major

Ab un pauc de seguransa.

Ja non creirai, qui que m'o jur,

Que vins non iesca de razim,

Et hom per Amor no meillur!

C'anc un pejurar non auzim,

Qu'ieu vaill lo mais per la meillor,

Empero si·m n'ai doptansa,

Qu'ieu no·m n'aus vanar, de paor

De so don ai m'esperansa.

Greu er ja que fols desnatur,

Et a follejar non recim

E folla que no·is desmesur!

E mals albres de mal noirim,

De mala brancha mala flor

E fruitz de mala pensansa

Revert al mal outra'l pejor,

Lai on Jois non a sobransa.

Que l'Amistats d'estraing atur

Falsa del lignatge Caim

Que met los sieus a mal ahur,

Car non tem anta ni blastim,

Los trai d'amar ab sa doussor,

Met lo fol en tal erransa

Qu'el non remanria ab lor

Qui·l donavan tota Fransa

• Artist:Marcabru