25% lyrics

[زاب ثروت]:

محبوس في دايرة من الأوهام واليأس

بحاول اتحرر كل يوم مش عارف لا بأس

يمكن لما الناس تتعرف علي أحزاني

تفهم تقدر تصرفاتي افعالي وجناني

لا بقي كفايه كفاية كفاية تبرير

كفاية كفاية محاولات بائسة للتغيير

خلاص مش هسكت هتكلم بادعوكو للسماع

هاختم كلامي في النهايه بكلمة الوداع

قررت أسيب حياتكم واسيبلكو المسرحية

افرحوا بالاضواء والتمثيل والنجومية

وهمية الدنيا اللي كلنا عايشين فيها

عارفين والغريب بسنانكو متبتين فيها

انا عارف ان أنا مش أول واحد يتعرض لضغوط

ولا هبقي آخر واحد ياخد حياته بأيده يموت

مش كفايه طول اليوم نظراتكم ليا

بتجوني في فكري قبل النوم وفي أحلامي اليومية

اسألتكوا بتنهش عقلي زي الضباع بتحوم

وازاي ألوم في ضبع كنت بأمره بالصوم

فا لو سألتوا هرد بأي كلام وأضحك عليكو

بزعل لما تصدقوا الكذبة وتكذبو عينيكو

يمكن بتصدقوني علشان ده اسهل علي ضميركو

بتسألوني مالك أنتم كتير وغيركم

بس عمر ما حد فيكم اهتم يسمع الاجابة

ولو فتحت قلبي ليكو هتقولولي بلاش كآبة

فسيبوني أروح لعالم تاني اجمل من عالمكو

أكون في وسط عالم أعلم بحالي منكو

الوداع للقوم الكاذبين المدعين

لا تصطنعوا اهتمامكم كلكم مكشوفين

[هاني الدقاق]:

مش وحيد بس وحدي

وسط ألمي ومحنتي

نفسي ليكو أقول وأحكي

تبقو سندي وقوتي

مش وحيد بس وحدي

وسط ألمي ومحنتي

نفسي ليكو أقول وأحكي

تبقو سندي وقوتي

[زاب ثروت]:

الوداع للقوم الكاذبين المدعين

لا تصطنعوا اهتمامكم كلكم مكشوفين

الكلام لمين؟ لكل المستمعين

وعلي لسان مين؟ مراهقين بكره يبقوا كبار

قلوب صغيره بتعاني سرعه الاحتضار

ضغوط الأهل والمجتمع أثرت عليهم

زرعت فيهم مشاكل أبدا ما كانت فيهم

من تهميش صوتهم ودورهم في مستقبلهم من أهلهم

معاناتهم لو اختلفو عن مجتمعهم في فكرهم

إزاي بتلوم في طفل أنت السبب في تكوينه

بتستنكر وجوده بتذل فيه وتهينه

أفعالك في الاساس هيا اصلا سبب المرض

لو مش عاجبك تربيته المفروض أنت اللي تتحرج

هرج ومرج جوه عقل الشاب اللى اتدرج

تحت تصنيف مكتئب عايش بيحلم بالفرج

الاكتئاب ده مرض مش حاله ولا موود

واصل لربع شبابنا بالأرقام والشهود

٢٥٪ من الشباب مكتئبين

بيعانوا أمراض نفسية وعن الحياة معزولين

٦٪ منهم بيفكروا في الانتحار

وارجع لكتاب اكتئاب المراهقين والاطفال

فماتربوش ولادكو عالأوامر والتهزيق

متكسروش مقاديفهم بالكبت والتضييق

العنف مش بس عنف مد اللسان والإيد

العنف كسر النفس وتحويلهم عبيد

فا لو أنت نفسك مش متصالح مع نفسك

ماتجبش في الدنيا طفل في أمراضك ينافسك

واعرف وافهم ان البنين زينة فتنة زي المال

فاللي معهوش فلوس بقي بيكنز في العيال

اللي غرقوا في مشاكل منشأها البيوت

أنا مش جاحد بفضل أهلي ولا بدعوكو للعقوق

أنا بوصل حقيقة مجتمعنا

مجتمع أملي وأملهم انه يسمعنا

[هاني الدقاق]:

مش وحيد بس وحدي

وسط ألمي ومحنتي

نفسي ليكو أقول وأحكي

تبقو سندي وقوتي

مش وحيد بس وحدي

وسط ألمي ومحنتي

نفسي ليكو أقول وأحكي

تبقو سندي وقوتي

• Artist:Zap Tharwat
• Album:Al Madina | المدينة